PROYECTO DE ANIMACIÓN CULTURAL "LUZÍA DUESO" 
 

En o curso academico 1997-1998, prenzipioron as clases d'aragonés en os zentros poblicos de cuatro puestos de l'Alto Aragón (Chaca, Biescas, L'Ainsa y Benás), mediante un pauto achustau d'entre ro Gobierno de Aragón y os Conzellos de ditos lugars. Ixo fue ra simién, os tarrancos, d'as clases d'aragonés que güe s'imparten, cuasi todas fora de l'orario escolar, en diferens zentros poblicos d'as comarcas d'a Chazetania, Alto Galligo, Sobrarbe y Alta Ribagorza por profesors achustaus por o Departamento de Educación, Cultura y Deporte d'o Gobierno de Aragón.

Añadas dimpués, en o curso 2005/2006, puesto que ros cuatro mayestros que bi-staba d'aragonés no teneban una formazión espezifica, como otros coleutibos de profesors de luengas, prenzipió á fer-se ro Seminario para profesores/as de aragonés en o CPR de Huesca. Iste seminario, andemás de contrebuyir ta l'autualizazión didauticae zentifica do profesorau, ha feito onra ta que iste escambiera esperienzias, esprisera enquietús y faziera propuestas y sucherenzias arredol d'o suyo treballo.

Agún se donó un paset más tadebán y, durante ro curso 2006/2007, se comenzipió á desembolicar, en os zentros do s'amostra aragonés, o Procheuto d'animazión arredol d'a Luenga e a Cultura Aragonesa. Iste procheuto, organizau por a Dirección General de Política Educativa y coordinado por Mª Pilar Benítez, ye un conchunto d'autibidaz en aragonés de caráuter zentifico e umanistico, ta ofrir-las á ros profesors, á ros escolanos y, en a mida que ye posible, á ros demás miembros d'a comunidá educatiba de ditos zentros.

D'ista traza, plegan ta ras aulas tallers y botigas do se treballan, de una traza ludica y didautica, contenius d'as diferens areas curriculars y que emplegan l'aragonés como luengua ta tresminar conoximientos: A falordia d'a raposa, Chuegos tradizionals, Os luthiers, Ritmo mosical, O Canut dels diapllerons e atras falordias, Bailes tradizionals, A mochileta de filar o Rezenta-falordias, Mosica popular, Fendo matematicas, Besitas d'autors, Seguindo ro bayo, O yayo bolador, Amostrando apegallos…

 
Todas istas autibidaz fan posible una miqueta potenziar y dinnificar, en os puestos de fabla aragonesa, l'aprendizache d'ista luengua, contrebuyir á ra empenta y dinnificazión d'as clases d' aragonés en os zentros y en os lugars do s'amuestra, dar notorio d'as presonas que emplegan a luenga aragonesa como idioma de cultura en diferens dembas d'o saper zentifico y umanistico y fazilitar á toda ra escolanalla y á tot ro profesorau autibidaz y contenius d'aprendizache sobre aspeutos culturals d'a nuesa Comunidá.

 

Mª Pilar Benítez Marco
Coordinadora del Procheuto d'animazión arredol d'a luenga e a cultura aragonesa
Esta dirección electrónica esta protegida contra spam bots. Necesita activar JavaScript para visualizarla

 
Díptico Procheuto d'animazión 2008-2009
Díptico Procheuto d'animazión 2009-2010
Díptico Procheuto d'animazión 2010-2011
Díptico Procheuto d'animazión 2011-2012